Eph 5 | BOJ | STEP | Niŋgi Qotei aqa segi aŋgro unub. A na niŋgi tulaŋ qalaqalaiŋgeqnu. Deqa kumbra a segi yeqnu qaji di niŋgi dego dauryosib yoqniye.

Ephesians 5

Niŋgi suwaŋ qaji tamo uŋgasari sosib suwaŋoq di laqniye

1 Niŋgi Qotei aqa segi aŋgro unub. A na niŋgi tulaŋ qalaqalaiŋgeqnu. Deqa kumbra a segi yeqnu qaji di niŋgi dego dauryosib yoqniye. 2 Kristus a na iga tulaŋ qalaqalaigosiq deqa aqa segi ŋambile uratosiq iga qa moiej. Dego kere niŋgi dego qalaqalaiyo kumbra dauryosib walweloqniye. Atra tamo naŋgi atraiyo iŋgi iŋgi sabaŋ quleq bolequja di oqnsib Qotei atraiyeqnub dego kere Kristus a na aqa segi ŋambile Qotei atraiyosiq moinaqa Qotei a deqa tulaŋ areboleboleiyej.

3 Niŋgi sambala kumbra yaib. Niŋgi kumbra jigat dego yaib. Niŋgi tamo qudei naŋgo iŋgi iŋgi qa mamaulŋgaiq. Kumbra uge deqaji nuŋgo ambleq di saiq. Iga Qotei aqa segi tamo uŋgasari unum deqa kumbra kalil deqaji iga na yoqnqasai. 4 Anjam jiga ti nanari anjam ti alaŋ anjam ti di dego niŋgi maroqnaib. Iga anjam deqaji maroqnqasai. Niŋgi anjam bei marqa oqnsib Qotei biŋiyoqniye. 5 Niŋgi endegsib qalieoiye. Tamo naŋgi sambala kumbra ti kumbra jiga ti yeqnub qaji naŋgi Qotei na oqasai. Tamo naŋgi mandam qa iŋgi iŋgi qa mamaulnjreqnu qaji naŋgi dego Qotei na oqasai. Tamo naŋgi mandam qa iŋgi iŋgi qa mamaulnjreqnu qaji naŋgo kumbra dena naŋgi gisaŋ qotei qa louobuleqnub. Deqa tamo naŋgi deqaji Kristus wo Qotei wo naŋgi na taqatnjrsib naŋgo Mandor Kokba sqasai.

6 Niŋgi geregere ŋam atiye. Tamo qudei naŋgi na niŋgi kumbra uge deqaji yqajqa titŋgoqnsib anjam laŋa laŋa merŋgoqnibqa niŋgi naŋgo anjam di qusib naŋgi daurnjraib. Tamo uŋgasari Qotei aqa anjam gotraŋyeqnub qaji naŋgi kumbra deqaji yeqnub deqa Qotei a naŋgi qa tulaŋ minjiŋ oqeteqnu. 7 Deqa niŋgi tamo deqaji naŋgi ti beteroqnaib. 8 Niŋgi nami ambruq di soqneb. Ariya bini Tamo Koba Qotei na niŋgi aqa suwaŋoq di atej unub. Deqa niŋgi suwaŋ qaji tamo uŋgasari sosib suwaŋoq di laqniye. 9 Suwaŋ a na kumbra endeqaji babteqnu. Tamo naŋgi suwaŋoq di unub qaji naŋgi kumbra bole bole yeqnub. Naŋgi kumbra tiŋtiŋ dauryeqnub. Naŋgi anjam bole mareqnub. 10 O was qu, kumbra kalil Tamo Koba Qotei a tulaŋ areareteqnu qaji di niŋgi qalieqa wauoqniye. 11 Tamo naŋgi ambruq di sosib kumbra uge uge yeqnub qaji naŋgi ti beteroqnaib. Kumbra naŋgi yeqnub qaji dena kumbra bole bei babtosaieqnu. Deqa niŋgi na tamo naŋgi di endegsib minjroqniye, “Nuŋgo kumbra di uge.” 12 Tamo naŋgi ambruq di unub qaji naŋgi ulioqnsib kumbra yeqnub. Di kiyaqa? Naŋgo kumbra di tulaŋ ugedamu. Deqa e naŋgo kumbra deqa maroqnsiy sqasai. Marqai di e jemaibqas. 13 Ariya suwaŋ a na kumbra kalil aqa utru babtoqnsiq boleq ateqnu. 14 Suwaŋ dena iŋgi qudei boleq ateqnaqa iŋgi di suwaŋobuleqnu. Agi anjam bei endegsi unu,

“Ni tamo ŋeiejunum qaji ni olo subq na tigel.
Yim Kristus a na ni suwaŋ emqas.”
15 Deqa was qu, niŋgi nuŋgo segi walwel gereiyosib soqniye. Niŋgi nanari tamo bulosib walwelaib. Niŋgi powo ti sosib walweloqniye. 16 Bini bati uge. Deqa niŋgi bati laŋa ñaŋguiyaib. Bati soqnim niŋgi Qotei aqa kumbra yoqniye. 17 Niŋgi nanari kumbra yoqnaib. Niŋgi Tamo Koba Qotei aqa areqalo geregere qalieosib dauryoqniye.

18 Niŋgi ya uge uyoqnsib nanarioqnaib. Kumbra dena niŋgi ugeugeiŋgwas. Deqa niŋgi Qotei aqa Mondor aqa kumbra dauryoqnibqa a na niŋgi taqatŋgesqas. 19 Niŋgi Qotei aqa tamo uŋgasari naŋgi koba na anjam maroqnsib bati deqa niŋgi Qotei qa louoqniye. Lou qudei neŋgreŋq di unu qaji de ti lou qudei Qotei aqa Mondor na nuŋgo are miligiq di tigelteqnu qaji de na ti niŋgi Qotei qa louoqniye. Osib nuŋgo medabu na ti nuŋgo are miligi na ti Tamo Koba Yesus qa louoqniye. 20 Kumbra bole kio uge kio nuŋgoq di brantoqnimqa, uŋgum, niŋgi bati gaigai gago Tamo Koba Yesus Kristus aqa ñam na Qotei biŋiyoqniye.

Pol a na tamo uŋgasari tamo ti uŋa ti unub qaji naŋgi anjam minjrej

21 Kristus a nuŋgo Tamo Koba unu deqa niŋgi a qa ulaoqnsibqa kumbra dena Qotei aqa tamo uŋgasari naŋgo sorgomq di soqniye.

22 O uŋgasari, niŋgi Tamo Koba Yesus aqa sorgomq di unub dego kere niŋgi nuŋgo tamo naŋgo sorgomq di dego soqniye. 23 Di kiyaqa? Kristus a Kristen tamo uŋgasari naŋgo gate koba unu dego kere nuŋgo tamo naŋgi dego nuŋgo gate unub. Iga kalil Kristus aqa jejamu qujai. A na iga eleŋej. 24 O uŋgasari, Kristen tamo uŋgasari naŋgi Kristus aqa sorgomq di unub dego kere niŋgi bati gaigai nuŋgo tamo naŋgo sorgomq di dego soqniye.

25 O tamo, Kristus a na aqa segi tamo uŋgasari naŋgi tulaŋ qalaqalainjrsiq deqa aqa segi ŋambile uratosiq naŋgi qa moiej. Dego kere niŋgi na nuŋgo uŋgasari naŋgi tulaŋ qalaqalainjroqniye. 26 Kristus a ya na ti aqa segi anjam na ti iga yansgej deqa iga aqa ŋamgalaq di tamo bole une saiqoji unum. Kumbra dena iga Kristus aqa segi tamo uŋgasari tiŋtiŋ unum. 27 Kristus aqa areqalo agiende. A na aqa segi tamo uŋgasari naŋgi yansnjrimqa naŋgi aqa ŋamgalaq di tulaŋ boledamu soqnib jiga bei naŋgoq di sqasai. Naŋgi aqa segi kumbra boleq di sosib une saiqoji sqab. Utru deqa a naŋgi qa moiej. 28 Deqa tamo, niŋgi na nuŋgo uŋgasari naŋgi tulaŋ qalaqalainjroqniye. Niŋgi na nuŋgo segi jejamu qalaqalaiyeqnub dego kere niŋgi na nuŋgo uŋgasari naŋgi dego qalaqalainjroqniye. Tamo naŋgi na naŋgo uŋgasari naŋgi qalaqalainjrqab di naŋgi naŋgo segi jejamu dego qalaqalaiyqab. 29 Iga qalie, tamo naŋgi naŋgo segi jejamu jeutosaieqnub. Naŋgi naŋgo jejamu iŋgi bole anaiyoqnsib geregereiyeqnub. Kristus a na aqa segi tamo uŋgasari naŋgi geregereinjreqnu dego kere. 30 Iga kalil Kristus aqa jejamu qujai. Iga segi segi aqa siŋga ti aqa baŋ ti unum. 31 Agi Qotei aqa anjam bei nami endegsib neŋgreŋyeb unu, “Tamo bei na aqa ai wo abu wo naŋgi uratnjrsimqa aqa segi ŋauqali wo beterosib jejamu qujaitosib sqab.” 32 O was qu, Qotei aqa uli anjam di tulaŋ kobaquja. E Kristus a ti aqa segi tamo uŋgasari naŋgi ti sigitnjrsim agi niŋgi merŋgonum. 33 Ariya anjam di Kristus a niŋgi tamo qa dego marej. Niŋgi nuŋgo segi jejamu qalaqalaiyeqnub dego kere niŋgi na nuŋgo uŋgasari naŋgi dego qalaqalainjroqniye. Ariya uŋgasari, niŋgi kamba dego nuŋgo tamo naŋgo sorgomq di geregere sosib naŋgi kumbra bole enjroqniye.